CASCADES Uummannamit Qaanaamut piareersarlugu

Maajimi SEDNA suleqatigalugu Uummannamut Qaanaamullu angalavunga, CASCADES-ip aasaanerani Avannaani umiarsuarmik ilisimatusarluni ingerlanneqarnissaanut piareersaaqataallunga.

Una angallavimmi allataavoq: suut paasisimanerlugit, pilersaarutini suut allanngorsimanersut, umiarsuarlu tikinnginnerani suut piareersarfigissallugit eqqumaffigineqassanersut.

CASCADES tassaavoq nunanit tamalaanit peqataaffigineqartumik issittumi ilisimatusarluni angalaneq, CCGS/NGCC Amundsen sikusiut angallatigalugu ingerlanneqartussaq. Umiarsuaq angalannginnerani pilersaarutit imartami aalisarnikkut, piniarnikkut pillugit angallavimmillu ilisimasaqartunik naapitsineq isumasiuinerlu ingerlappagut. Paasissutissat annertunerusut uani takusinnaavatit: https://cascades-expedition.science/kl/

Nunap assinga pilersaarutinut aallaavigaarput, inoqarfinnili oqaloqatigiinnerit aasamut pilersaarutinut sumiiffiit tikinnissaannut piareersaatinik ersarinnerulersitsipput.

Naapitanik oqaloqatigiinnerit ilaat umiarsualivimmi pipput. Ilaat piniartut angerlarsimaffiini kaffissuutigaluta. Ilaat sikukkut angalanitsinni piniartut angallavimmi aqqusaakkavut sarfat, ikkannersat, uumasut neriniarfii aqqutissallu aallaavigalugit oqaluttuarnerini.

Uummannaq: Talittarfiimmiik aallartippugut

Talittarfimmi apersuilluta naapitagullu oqaluullugit aallartippugut. Inuit sullipput, angallatit ataavartumik tulaterput ilaallu avalangarlutik. Isumasiuinerit oqaloqatigiinnerillu angallatit aallangartut tikittullu qanillugit ingerlanneri pissusissamisoortoq paasisavut aallaavigalugit nalilerparput.

Aalisarfiit sumiiffii aammalu kangerluit angallaviit pillugit apersuivugut. CASCADES-ip pilersaarutai angalasut qanoq isumaqarfigineraat aammalu siunnersuutaat tusarniarpagut.

Kingorna Jørgen Kruse aamma Svend Løvstrøm oqaloqatigivavut. Qeqertarsuup timaa, Ukussissat Kangerlua aammalu Ingiap Kangerlua eqqartorpagut.

Siunnersuutit paasisallu ingerlateqqitassagut Uummannamit aallarnitsinni nassarpagut. Sumiiffiit aammalu aalisarfiit pingaarnerit sissuerneqartussat maluginiangassatut eqqartorneqarput. Kangerluit ilorpasinnerusut ikkattuupput, sissamut qanittumi suliaqassangaanni angallatinik ammasunik minnernik angallassisoqarluni imal. angallateqarluni suliaqarnissaq pitsaanerussaaq.

Aammattaaq CASCADES misisissuinermi paasisanik sunik pissarsissanersoq soqutigineqarpoq. Immap naqqa, qalerallit, eqalussuit, ningittangaarsiutit, siornatigut saattuarniarluni sumiiffiit misiligarneqarsimasut, aammalu uuttuutit suut atorneqassanersut apeqqutigineqarput.

Uummannami aalisartut angalasullu naapitatta umiarsuup tikittussap suna suliarissaneraa paasiniarpaat, kingornalu suna misissuinermi paasineqarsimanersoq tusarusullugu.

Qaanaaq: Piniartut peqatigiiffiat naapillugu kangerlunnilu angalaneq

Uummannap kingorna Qaanaamut nunaqarfiinullu ingerlaqqippugut.

Adolf Simigaq attavittut siullertut naapipparput, attavissatsinnik akissutinillu apuussivingaatigut. Aqaguani Qaanaami Piniartut Aalisartullu Peqatigiiffianni ilaasortat aqutsisullu pisinnaasut naapippagut.

Ataatsimiinnerup kingorna CASCADES pillugu pilersaarutit inoqarfinni inuit aallaavigalugit piareersarnissamut kaammattuinitsinni Nicolasilu neriuutigisatsinnik CASCADES-imut suliaqartunut apuutsinissatsinnut tunaartaqarluartumik naapinnerup kingorna piareersarnissaa qaninnerulerpoq.

Piniartut qangaaniilli massakkumut ilisimasaat aallaavigalugit makku eqqartorneqarput: qilalukkat qernertat ingerlavii, qajaq atorlugu piniarneq, aakkarnerit sumiiffii, ikkannersat, sarfat sakkortuut, kitaatungaani avannaatungaanilu angalasut aqqutigisartangaat, aammalu sumiiffinni aaliangersimasuni piniartut/angalasut ikiortigalugit umiarsuarmiit ilisimatuut angallanneqarsinnaanerinut pilersaarutit.

Umiarsuaq tikitsinnagu sillimaffissat sumiiffiillu tikinneqartussat piniartut isumaat allaavigalugit piareersarneqarput.

Piniartup peqatigiiffianniik siunnersuutigineqarpoq umiarsuaq qilalukkat qernertat neriniarfiinut aasakkullu uninngaffigisartagaanniit ingerlaartarfiinullu suliaqarnermini qanippallaassanngitsoq. Kangerlussuarmi ilorpasittumi nunamut qanittut neriniarfiit piniarnermut qilalukkallu ingerlaartarnerannut pingaaruteqartut sumiiffiit eqqartorneqarput.

Aamma misissuinermi atortut pillugit apersortoqarpoq. Suut immami misissuinermi atorneqassappat? Suut immap naqqani misissuisoqassappat sakkugineqassappat? Qanoq nipitutigisumik misissuineq ingerlanneqassava? Suut misissugassat tiguneqassappat? Angalalluni suliaq qanoq sivisutigissava? Apeqqutit taakku pilersaarusiornermi akissallugit pingaaruteqarput, umiarsuaq ilisimatusartunik ilaasulik kangerlummut inuit piniakkallu angallaviannnut appakaatinnginnerani.

Angalanermi paasisat

Qaanaami oqaloqatigiinnerit angallavimmi ingerlateqqippagut.

Qimussimik piniartunut ilaalluta Siorapaluup tungaanut ingerlavugut. Avannerpoq, sikut ingerlaarput sikullu Siorapaluup tungaanut atoruminaannera saavigarnissaanullu ilimanaateqarnera pissutigalugu Siorapaluk tikinngilarput. Umiivimmi unnuivugut, aqaguanilu Qaanaamut uterluta.

Angallavimmi paasisagut sumiiffiillu timitarsisagut amerlapput. Aqqutit, illernit, sila, qaanngut sikulu ingerlavigisarput eqqartukkanut piniartut Qipisoq Uvdloriaq aamma Peter Simigaq ilisimasaat aallaavigalugit CASCADES-imut ingerlateqqitassatut inissilluarpagut.

Angallavimmi piniartut pappialakkut nassuiarneqarsinnaanngitsut takutillugit paasitippaat: ikkanneqarfiit, aakkarneqarfiit, qaanngut aqqutit, sarfat aakkartitsisarnerat, aammalu sikup ukiup allanngornerani qanoq angallavittut allanngorartarnera.

Angallavimmi avatagiitsit maluginiarlugillu sillimaffigisassaapput. Sila, siku, uumasut, angallatigineqartut sakkullu nassatat, ilisimasat iliuusissatullu sillimmatit tamaasa piareersimaffigineqarluartussaapput.

Qeqertat kangerlussuullu ilorpasinnerusortaa

Qeqertanut aamma tikippugut, inuillu taavani najuaqartut ilaat angerlarsimaffiini pulaarlugit naapillugit.

Qeqertat kangerlussuup ilorpiaani inissisimapput timaanniippullu sermeqarfiit kangerluillu uumasut neriniarfii. Kangerluk sermillu eqqaa qilalukkat qernertat, qilalukkat qaqortat, qalerallit, eqalukkat, uumasut neriniarfiat piniarfiusoq aaliasarfiusorlu tassaniippoq. Taamaattumik Qeqertat tikinnissaa misissuinissamut tunngatillugu uatsinnut pingaaruteqarpoq.

Inuit Qeqertani naapitatta CASCADES soqutigaat, aammalu erseqqissumik umiarsuup sumut qanorlu pulaternissaa misissuinissaalu apeqqusersorpaat paaserusullugulu.

Motoorit angisuut umiarsuillu angisuut nipitigut avatangiisinut sunniuteqartarput. Kangerlussuullu ilorpasinnerusortaani qaannamik piniarneq aammalu umiamik/umiatsimik ipulluni ilummukarneq ileqqutut suli piniartut ilaannit attanneqarpoq.

Qeqertani Nukappiannguup Qillutuullu CASCADES-imut siunnersuutaat ersaripput: umiarsuit nalinginnaasumik ingerlaarfiinik atuisoqassaaq, umiarsuaq nunamut, serminut, qeqertanut piniarfinnullu qanittunut mianernartunut kaleriitinnani qanillivallaannginnissaa neriuutigineqarpoq.

Ilisimatuut sumiiffinni taakkunani qanittumi suliaqassappata, umiatsiat piniartunik aqunneqartut ikaarfigalugut nunamut sermimullu qanittut tikinneqarnissaat kaammaattuutigineqarpoq.

Piareersaanerup paasisat aallaavigalugit nutarterneqarnera

Aasamut CASCADES-ip angalanissamut pilersaarutaai inoqarfinni angallavimmilu paasisagut aallaavigalugu naleqqussarpagut apuussassanngorlugit.

Angallammik aqqutigineqartartut, mianerisassat aammalu suliaq qanoq ingerlanneqassanersoq assilianngorlugu pilersaarusiornera aallaavigalugu pisussap piviusunngornissaanut qaninnerulerpoq.

Angalanermi pissarsiakka eqikkarlugit imatut allassinnaavakka:

• ilisimatusarnermi oqariartaatsit allariaatsit misissuinermilu atortut oqaatsivut atorlugit paasiuminartumik ersarissumik nassuiarnissaat;
• sumiiffimmi inoqarfinni inuit attaveqarfiit suliaq sioqqullugu ingerlanneqarneranilu attaveqaqatiginissaat;
• umiarsuup angallatigineqartup nunamut sumiiffinnullu mianerisassanut qanillivallaannginnissaa pillugu sumiiffinnik erseqqissaanissaq;
• sermit qanittuannut kangerluullu ilorpasinnerusortaanut angalasoqassappat misissuisoqarluni piniartunik ilisimasortanik angallassisoqarnissaq suleqateqarnissarlu;
• qilalungarniarfiit, qaannamik piniarfiit aalisarfiillu mianeralugit sulisoqarnissaa;
• radio/VHF atorlugu attaveqarneq; suliaq ingerlanneqarnerani kanalinik ammatitsinissaq;
• ilisimatuut misissuereernerisa kingorna paasisanik inoqarfinnut anngussinnissaq.

Uannnut SIKUMUT-mullu paasissutissat taakku pisariallit pilersaarusiornermi allannguutinut siunnersuutinullu CASCADES-imut anngussassanut nutarsaanermut iluaqutaassapput.

Tassa imaappoq ilisimatusarnermi piareersaaatit, suliat anguniakkallu nassuiarsinnaasariaqarpavut, inoqarfinniillu siunnersuutit aallaavigalugit aqqutissat periusissanillu piareersaanerup aaliangiutivinneqannginnera sioqqullugu siunnersuutit ilisimatusartuniit tigulluarneqarnissaat pisariaqarpoq. Suliaq naammassippallu ilisimatusarnermi paasisat inoqarfinni taakkununnga anngunneqarnissaat pingaartipparput.

Taamatut suliaqarnermi ataqqinnittumik angallaviit, inoqarfiit piniarfiillu aallaavigalugit piareersartarnissaq suliniutinut annertuunut aamma allanut ingerlateqqikkusuppara.